ܦܵܣܘܿܥܬܵܐ 5 – ܣܲܒ݂ܪ̈ܝܼ ܘܚܸܠ̈ܡܵܢܝܼ ܒܕܲܥܬܝܼܕ
ܟܠܚܲܕ ܐ݇ܢܵܫܵܐ ܐܝܼܬܠܹܗ ܣܲܒ݂ܪܹ̈ܐ ܘܚܸܠܡܵܢܹ̈ܐ. NDIS ܟܹܐ ܡܲܕܸܥܠܗܘܿܢ ܣܲܒ݂ܪܹ̈ܐ ܘܚܸܠܡܵܢܹ̈ܐ ܐܲܝܟ݂ ‘ܝܘܼܐܵܒܹ̈ܐ’ (‘aspirations’). ܝܘܼܐܵܒܹ̈ܐ ܝܼܢܵܐ ܐܵܢܝܼ ܡܸܢܕܝܼܵܢܹ̈ܐ ܕܐܲܚܬܘܿܢ ܒܵܥܝܼܬܘܿܢ ܕܗܵܘܝܼ ܒܕܲܥܬܝܼܕ. ܚܲܕܟܡܵܐ ܒܲܠܟܵܐ ܕܗܵܘܝܼ ܓܘܼܒ݂ܪܹ̈ܐ ܘܩܵܐ ܚܲܕ ܡܸܬܚܵܐ ܝܲܪܝܼܟ݂ܵܐ ܘܒܲܠܟܵܐ ܕܗܵܘܝܼ ܠܵܐ ܡܸܬܡܲܨܝܵܢܹ̈ܐ ܠܸܗܘܵܝܵܐ، ܟܲܕ ܐ݇ܚܹܪ݇ܢܹ̈ܐ ܒܲܠܟܵܐ ܕܗܵܘܝܼ ܒܘܼܫ ܙܥܘܿܪܹ̈ܐ ܘܡܸܬܡܲܨܝܵܢܹ̈ܐ ܕܗܵܘܝܼ ܒܘܼܫ ܒܓ̰ܲܠܕܘܼܬܵܐ. ܢܝܼܫܹ̈ܐ ܕܝܼܢܵܐ ܚܲܕ ܣܲܗܡܵܐ ܕܚܙܘܼܩܝܵܐ ܕܒܣܵܡܬܵܐ، ܐܵܢܲܢܩܵܝܹ̈ܐ ܝܢܵܐ. ܐܲܢܹܐ ܒܲܠܟܵܐ ܕܗܵܘܝܼ ܒܫܵܘܦܵܢܹ̈ܐ ܦܪ̈ܝܼܫܹܐ ܕܚܲܝܵܘܟ݂̈ܘܿܢ.
ܓܵܘ ܟܬܵܒ݂ܵܘܟ݂ܘܿܢ ܕܦܘܼܠܚܵܢܵܐ ܕ reimagine.today (ܝܲܢ ܬܘܼܠܚܵܡܵܐ app)، ܐܲܚܬܘܿܢ ܡܵܨܝܼܬܘܿܢ ܕܨܲܚܨܝܼܬܘܿܢ ܠܗܘܿܢ ܣܲܒ݂ܪܵܘܟ݂̈ܘܿܢ ܘܚܸܠܡܵܢܵܘܟ݂̈ܘܿܢ. ܐܲܢܹܐ ܝܼܢܵܐ ܚܲܕܟܡܵܐ ܫܵܘܦܵܢܹ̈ܐ ܕܓܵܘ ܚܲܝܹ̈ܐ ܕܒܲܠܟܵܐ ܗܘܝܼܠܵܘܟ݂ܘܿܢ ܣܲܒ݂ܪܹ̈ܐ ܘܚܸܠܡܵܢܹ̈ܐ ܩܵܐܠܲܝܗܝ:
- ܓܘܼܒܵܝܵܐ ܘܡܕܲܒܪܵܢܘܼܬܵܐ – ܥܒ݂ܵܕܬܵܐ ܕܩܛܵܥܝܵܬܹ̈ܐ ܒܘܼܬ ܡܸܢܕܝܼܵܢܹ̈ܐ ܕܐܵܢܲܢܩܵܝܹ̈ܐ ܝܢܵܐ ܩܵܐܠܵܘܟ݂ܘܿܢ، ܘܩܵܐ ܐܘܼܪܚܵܐ ܕܒܸܚܵܝܵܐ ܝܬܘܿܢ ܘܩܵܐ ܦܲܪܨܘܿܦܵܐ ܕܒܸܣܢܵܕܵܘܟ݂ܘܿܢ ܝܼܠܹܗ.
- ܥܵܒ݂ܘܿܕܘܼܝܵܬܹ̈ܐ ܝܵܘܡܵܝܹ̈ܐ – ܐܲܢܹܐ ܝܼܢܵܐ ܡܸܢܕܝܼܵܢܹ̈ܐ ܕܟܹܐ ܥܵܒ݂ܕܝܼܬܘܿܢ ܠܗܘܿܢ ܡ̣ܢ ܝܵܘܡܵܐ ܠܝܵܘܡܵܐ، ܐܲܝܟ݂ ܒܲܫܲܠܬܵܐ، ܘܫܲܘܲܩܬܵܐ، ܘܬܲܡܲܙܬܵܐ ܘܣܲܚܒܲܪܬܵܐ ܠܕܘܼܟܵܢܹ̈ܐ ܦܪ̈ܝܼܫܹܐ.
- ܐ݇ܚܝܵܢܘܼܝܵܬܹ̈ܐ – ܐ݇ܢܵܫܹ̈ܐ ܕܐܝܼܬ ܠܵܘܟ݂ܘܿܢ ܓܵܘ ܚܲܝܵܘܟ݂̈ܘܿܢ ܘܕܵܐܟ݂ܝܼ ܠܸܣܢܵܕܲܝܗܝ ܐ݇ܚܝܵܢܘܼܝܵܬܵܘܟ݂̈ܘܿܢ ܥܲܡܲܝܗܝ.
- ܒܲܝܬܵܐ – ܕܘܼܟܬܵܐ ܐܲܝܟܵܐ ܕܟܹܐ ܚܵܝܝܼܬܘܿܢ ܘܐܸܢ ܒܸܠܚܵܡܵܐ ܝܠܵܗ̇ ܩܵܐܠܵܘܟ݂ܘܿܢ.
- ܚܘܼܠܡܵܢܵܐ ܘܛܵܒ݂ܘܼܬܵܐ ܕܚܲܝܹ̈ܐ – ܚܘܼܠܡܵܢܵܘܟ݂ܘܿܢ ܦܲܓ݂ܪܵܢܵܝܵܐ ܘܟܠܵܢܵܝܵܐ، ܐܲܝܟ݂ ܢܘܼܦܵܩܵܐ ܦܲܓ݂ܪܵܢܵܝܵܐ (ܐܹܟܣܸܪܣܵܝܣ) ܘܡܹܐܟ݂ܘܼܠܬܵܐ ܡܬܲܪܣܝܵܢܬܵܐ.
- ܩܢܵܝܬܵܐ ܕܝܘܼܠܦܵܢܵܐ ܩܵܐ ܟܠܲܝܗܝ ܫܸܢܹ̈ܐ ܕܚܲܝܹ̈ܐ – ܡܸܢܕܝܼܵܢܹ̈ܐ ܕܒܵܥܝܼܬܘܿܢ ܕܝܵܠܦܝܼܬܘܿܢ ܠܗܘܿܢ. ܐܲܝܵܐ ܡܵܨܝܵܐ ܕܗܵܘܝܵܐ ܒܪܵܒܵܐ ܐܘܼܪ̈ܚܵܬܹܐ، ܠܵܐ ܐܲܚܟ̰ܝܼ ܓܵܘ ܚܲܕ ܒܹܝܬ ܝܘܼܠܦܵܢܵܐ.
- ܦܘܼܠܚܵܢܵܐ – ܐܵܗܵܐ ܡܵܨܝܵܐ ܕܚܵܒܸܫ ܦܘܼܠܚܵܢܵܐ ܨܸܒ݂ܝܵܢܵܝܵܐ (ܠܵܐ ܒܡܘܼܥܵܫܵܐ) ܝܲܢ ܦܘܼܠܚܵܢܵܐ ܒܡܘܼܥܵܫܵܐ.
- ܫܲܘܬܲܦܬܵܐ ܫܲܘܬܵܦܵܝܬܵܐ ܘܟܢܘܼܫܝܵܝܬܵܐ – ܫܲܘܬܘܼܦܹܐ ܓܵܘ ܡܸܢܕܝܼܵܢܹ̈ܐ ܕܟܹܐ ܡܲܒܣܸܡܝܼܠܵܘܟ݂ܘܿܢ، ܘܡܫܲܪܲܟܬܵܐ ܕܐܲܢܹܐ ܡܸܢܕܝܼܵܢܹ̈ܐ ܥܲܡ ܐ݇ܚܹܪ݇ܢܹ̈ܐ، ܗܵܕܟ݂ܵܐ ܕܪܵܓ݂ܫܝܼܬܘܿܢ ܕܐܝܼܬܠܵܘܟ݂ܘܿܢ ܒܲܝܬܵܝܘܼܬܵܐ ܥܲܡ ܐ݇ܢܵܫܹ̈ܐ ܐ݇ܚܹܪܢܹ̈ܐ ܓܵܘ ܟܢܘܼܫܬܵܐ.
ܨܲܚܨܘܼܢ ܠܗܘܿܢ ܣܲܒ݂̈ܪܹܐ ܘܚܸܠܡܵܢܹ̈ܐ ܕܚܲܒ݂̈ܪܵܢܵܘܟ݂ܘܿܢ ܕ reimagine.today ܠܲܐܟ݂ܵܐ:
✎ ܥܵܒ݂ܘܿܕܘܼܬܵܐ ܕܝܠܵܦܬܵܐ
ܨܲܚܨܘܼܢ ܠܗܘܿܢ ܣܲܒ݂ܪܹ̈ܐ ܘܚܸܠܡܵܢܹ̈ܐ ܓܵܘ ܐܲܝܵܐ ܥܵܒ݂ܘܿܕܘܼܬܵܐ.
ܨܲܚܨܘܼܝܲܝܗܝ ܣܲܒ݂̈ܪܲܢ ܘܚܸܠ̈ܡܵܢܲܢ (EXPLORING OUR HOPES AND DREAMS ►)
ܗܵܕܝܼܵܐ ܓܲܪܵܘܟ݂ܘܿܢ ܝܼܠܹܗ. ܓܵܘ ܟܬܵܒ݂ܵܘܟ݂ܘܿܢ ܕܦܘܼܠܚܵܢܵܐ، ܡܠܘܿܢ ܠܹܗ ܣܲܗܡܵܐ ܕ ‘ܣܲܒ݂ܪ̈ܝܼ ܘܚܸܠ̈ܡܵܢܝܼ’. ܫܲܪܘܼܢ ܟܲܕ ܐܲܚܬܘܿܢ ܨܲܠܡܘܼܢܹܐ ܐܲܝܟ݂ ܕܐܸܢ ܬܵܡܵܐ ܠܲܝܬ ܗܘܵܐ ܟ̰ܘܼ ܡܥܲܪ̈ܩܸܠܵܢܹܐ، ܘܕܵܐܟ݂ܝܼ ܒܸܕ ܡܲܒܝܸܢܝܼ ܚܲܝܵܘܟ݂̈ܘܿܢ ܛܘܼܦ̮ܣܵܢܵܝܹ̈ܐ؟ ܡܘܿܕܝܼ ܝܢܵܐ ܣܲܒ݂ܪܵܘܟ݂̈ܘܿܢ ܘܚܸܠܡܵܢܵܘܟ݂̈ܘܿܢ؟ ܗܵܘܝܼܬܘܿܢ ܡܒܲܪ̈ܝܵܢܹܐ ܐܲܝܟ݂ ܟܡܵܐ ܕܒܵܥܝܼܬܘܿܢ. ܒܗ̇ܝܓܵܗܐ ܪܚܘܿܫܘܼܢ ܠܣܲܗܡܵܐ ܕ ‘ܨܲܚܨܘܼܝܲܝܗܝ ܣܲܒ݂ܪ̈ܝܼ ܘܚܸܠ̈ܡܵܢܝܼ’ ܘܦܪܘܿܫܘܼܢ ܠܗܲܠ ܬܠܵܬܵܐ ܣܲܒ݂ܪܹ̈ܐ \ ܚܸܠܡܵܢܹ̈ܐ ܕܨܲܚܨܝܼܬܘܿܢ ܠܗܘܿܢ ܒܘܼܫ ܒܡܲܠܝܘܼܬܵܐ.
ܨܲܚܨܵܝܬܵܐ ܕܢܝܼܫܵܘܟ݂̈ܘܿܢ ܠܵܐ ܝܠܵܗ̇ ܐܲܚܟ̰ܝܼ ܐܵܢܲܢܩܵܝܬܵܐ ܩܵܐ NDIS، ܐܝܼܢܵܐ ܐܵܦ ܩܵܐ ܚܲܝܹ̈ܐ ܘܩܵܐ ܚܲܡܵܝܬܵܐ ܕܣܲܒ݂ܪܵܐ. ܓܵܘ ܟܬܵܒ݂ܵܘܟ݂ܘܿܢ ܕܦܘܼܠܚܵܢܵܐ، ܡܵܨܝܼܬܘܿܢ ܕܣܵܕܪܝܼܬܘܿܢ ܠܗܘܿܢ ܝܘܼܐܵܒ݂ܵܘܟ݂̈ܘܿܢ (aspirations). ܐܵܢܲܢܩܵܝܬܵܐ ܝܠܵܗ̇ ܕܕܵܟ݂ܪܝܼܬܘܿܢ ܕܗܲܡܙܲܡܬܵܐ ܒܘܼܬ ܐܲܢܹܐ ܡܸܢܕܝܼܵܢܹ̈ܐ ܒܲܠܟܵܐ ܕܡܲܥܒܸܕܵܐ ܠܵܘܟ݂ܘܿܢ ܕܪܵܓ݂ܫܝܼܬܘܿܢ ܒܙܲܒܘܼܢܘܼܬܵܐ ܘܕܣܢܝܼܩܹܐ ܝܬܘܿܢ ܠܗܲܝܲܪܬܵܐ. ܩܵܐ ܒܘܼܬ ܐܵܗܵܐ، ܐܵܢܲܢܩܵܝܬܵܐ ܝܠܵܗ̇ ܕܪܵܓ݂ܫܝܼܬܘܿܢ ܒܪܲܗܲܬܘܼܬܵܐ ܐܝܼܡܲܢ ܕܗܲܡܙܘܼܡܹܐ ܝܬܘܿܢ ܥܲܡ ܐ݇ܢܵܫܹ̈ܐ ܐ݇ܚܹܪ݇ܢܹ̈ܐ ܒܘܼܬ ܐܲܢܹܐ ܡܸܢܕܝܼܵܢܹ̈ܐ.
